கம்ப்யூட்டர் விற்பனையில் முன்னிலையில் இருக்கும் டெல் நிறுவனத்தின் தலைவர் மைக்கேல் டெல் (Michael Dell) பிறந்த நாள் இன்று (பிப்ரவரி 23). அவரைப் பற்றிய அரிய முத்துக்கள் பத்து:
அமெரிக்காவின் ஹூஸ்டன் நகரில் பிறந்தார் (1965). சிறு வயதில் தபால் தலைகள் சேர்ப்பதில் ஆர்வம் கொண்டிருந்தார். அதற்கு வரவேற்பு இருப்பதை அறிந்து, யாருடைய உதவியுமின்றி, தானே விளம்பரம் கொடுத்து 10 வயதுக்குள் 2 ஆயிரம் டாலர் சம்பாதித்தார்.
பள்ளியில் படிக்கும்போது செய்தித்தாள் முகவராக வேலை பார்த்தார். நகரில் புதிதாக குடியேறியவர்கள், புதுமணத் தம்பதிகளின் முகவரிகளை அரசு அலுவலகத்தில் பெற்று, அவர்களிடம் சந்தா பெற்றார். மற்றவர்களைவிட அதிகம் சம்பாதித்தார்.
அப்பா அவருக்கு வாங்கித் தந்த புது ஆப்பிள் கணி னியை அக்கு வேறு ஆணி வேறாகக் கழற்றி, பிறகு கச்சிதமாக பொருத்தி கணினி பற்றிக் கற்றுக்கொண்டார்.
கணினியின் வடிவமைப்பு குறித்தும், வர்த்தக ரீதியாகவும் பல விஷயங்களை அறிந்தார். கணினித் தொழிலில் இடைத்தரகர்கள்தான் அதிக லாபம் அடைகிறார்கள். வாடிக்கையாளர்களின் கருத்துக்கு மதிப்பு அளிக்கப் படுவதில்லை என்று தெரிந்துகொண்டார்.
டெக்சாஸ் பல்கலைக்கழகத்தில் தனது விடுதி அறையி லேயே பி.சி.லிமிடெட் என்ற பெயரில் நிறுவனம் தொடங் கினார். கணினி உதிரிபாகங்களை வாங்கி, அவற்றை பொருத்தி கணினியை உருவாக்கி விற்றார். அதிக லாபம் கிடைத்ததால் 19 வயதில் படிப்பை நிறுத்திவிட்டு, முழு மூச்சாக தொழிலில் இறங்கினார்.
தரகர்கள் இல்லாமல் நேரடியாக சேவைகளை வழங்கிய தால் கணினிகளை மலிவாகத் தரமுடிந்தது. போட்டி நிறுவனங்களும் வேறு வழியின்றி கணினி விலையைக் குறைத்தன.
வாடிக்கையாளர்கள் எளிதில் தொடர்புகொண்டு தங்கள் தேவைகள், குறைகளைத் தெரிவிக்க தொலைபேசி, இணையம், நேரடி சந்திப்பு என பல வசதிகளைச் செய்தார். அவர்களது குறைகளைப் போக்க உடனுக்குடன் நட வடிக்கை எடுத்தார். வாடிக்கையாளரின் திருப்தியை முழுமையாகச் சம்பாதிக்கும் நிறுவனம் என்ற நற்பெயரும் கிடைத்தது.
1987-ல் நிறுவனத்தின் பெயரை ‘டெல் கம்ப்யூட்டர் கார்ப் பரேஷன்’ என மாற்றினார். 1992-ல் ‘ஃபார்ச்சூன்’ இதழின் ‘டாப் 500’ நிறுவனங்கள் பட்டியலில் டெல் இடம்பிடித்தது. அப்போது இவருக்கு வயது 27. பட்டியலில் மிகவும் இளமையான தலைமை செயல் அதிகாரி (சிஇஓ) இவர்தான்.
1999-ல் டெல் நிறுவன உத்தி பற்றிப் புத்தகம் எழுதி வெளியிட்டார். மைக்கேல் சூஸன் அறக்கட்டளை மூலம் ஏழை, எளியவர் கல்வி, மருத்துவத்துக்கு உதவிவருகிறார்.
உலகப் பொருளாதாரப் பேரவை, சர்வதேச பிசினஸ் கவுன்சில், டெக்னாலஜி சிஇஓ கவுன்சில் ஆகியவற்றில் உறுப்பினராக இருக்கிறார். ‘மக்களின் தேவை அறிந்து, வாய்ப்புகளைக் கண்டறியுங்கள். அதை வெற்றியாக மாற்றுங்கள்’ என்ற இவரது தாரக மந்திரத்தின் அடிப்படையில் டெல் நிறுவனம் தொடர்ந்து வெற்றிநடை போடுகிறது.
********
ஆப்பிள் நிறுவனத்தின் இணை நிறுவனரும், கம்ப்யூட்டர் துறையில் புரட்சியை உருவாக்கியவருமான ஸ்டீவன் பால் ஜாப்ஸ் (Steven Paul Jobs) பிறந்த தினம் இன்று (பிப்ரவரி 24). அவரைப் பற்றிய அரிய முத்துக்கள் பத்து:
அமெரிக்காவின் சான் பிரான்சிஸ்கோவில் பிறந்தவர் (1955). பல் கலைக்கழகத்தில் படித்துக்கொண்டிருந்த, திருமணமாகாத ஜோடிக் குப் பிறந்தவர். பால் ரெய்ன்ஹோல்ட் ஜாப்ஸ் கிளாரா தம்பதி இவரை தத்து எடுத்தனர். ‘நூறு சதவீதம் அவர்கள்தான் என் அப்பா, அம்மா’ என்று ஆணித்தரமாகக் கூறுவார் ஸ்டீவ் ஜாப்ஸ்.
இவருக்கு 5 வயதாக இருந்தபோது குடும்பம் கலிபோர்னியாவுக்கு குடிபெயர்ந்தது. அப்பா மூலமாக எலக்ட்ரானிக்ஸ் துறையில் நாட்டம் ஏற்பட்டது. இவர் பள்ளி செல்லத் தொடங்கும் முன்பே எழுதப் படிக்கக் கற்றுத் தந்தார் அம்மா.
பள்ளிப் படிப்பை முடித்தவர், பாதியிலேயே கல்லூரியில் இருந்து வெளியேறினார். எலக்ட்ரானிக்ஸ் சம்பந்தமான வேலைகளைச் செய்துவந்தார்.
1974-ல் ஆன்மிக அமைதியை நாடி இந்தியா வந்தார். நீம் கரோலி பாபாவைத் தரிசிக்க, உத்தரப் பிரதேசம், கைஞ்சி ஆசிரமத்துக்குத் தன் நண்பர்களுடன் வந்தார். இந்தியாவில் 7 மாதங்கள் தங்கிப் பல இடங்களுக்கு சுற்றுப் பயணம் சென்றார். பாபாவைத் தன் ஆன்மிக குருவாக ஏற்றார். இதுவே அவர் புத்த மதத்தைத் தழுவக் காரணமாக இருந்தது.
1976-ல் வீட்டிலேயே நண்பர்களுடன் இணைந்து ஆப்பிள் கம்ப்யூட்டர் நிறுவனத்தை தொடங்கினர். 1980-ல் ஆப்பிள் நிறுவனத்தின் மகின்டோஷ் (Macintosh) கணினியை அறிமுகம் செய்தார். கருத்து வேறுபாடுகளால் 1985-ல் ஆப்பிள் நிறுவனத்தில் இருந்து வெளியேறி நெக்ஸ்ட் (NeXT) கணினி நிறுவனத்தை தொடங்கினார்.
கம்ப்யூட்டர் கிராபிக்ஸ் துறையில் சிறந்த நிபுணர்களைக் கொண்ட லூகாஸ் பிலிம் என்ற நிறுவனத்தை வாங்கினார். அந்த நிறுவனம் பிக்ஸர் என்ற பெயரில் அனிமேஷன் துறையில் மென்பொருள் தயாரிப்பு மற்றும் உயர்கணினித் தயாரிப்புகளில் ஈடுபடத் தொடங்கியது.
1995-ல் முழு அனிமேஷன் திரைப்படம் உருவாக்கும் பணியை டிஸ்னி நிறுவனம் இவருக்கு வழங்கியது. ‘டாய் ஸ்டோரி’ என்ற அந்த முழு அனிமேஷன் திரைப்படம் மாபெரும் வெற்றி பெற்றது. 1996-ல் நெக்ஸ்ட் நிறுவனத்தை ஆப்பிள் நிறுவனம் வாங்கியது. ஜாப்ஸ் மீண்டும் ஆப்பிளில் இணைந்தார். 1998-ல் இவர் வடிவமைத்து பல வண்ணங்களில் வெளிவந்த ஐ-மாக் கணினி மாபெரும் வெற்றி பெற்றது.
தொடர்ந்து கணினியின் வேகத்தைக் கூட்டி வடிவமைப்பிலும் பல மாற்றங்கள், புதுமைகளைப் புகுத்தினார். இதைத் தொடர்ந்து ஐ-பாட், ஐ-ட்யுன்ஸ், ஐ-பேட் மினி ஆகியவையும் வெற்றி பெற்றன.
அமெரிக்காவின் தொழில்நுட்பம் மற்றும் புதுமை கண்டுபிடிப்புக்கான மிக உயர்ந்த பதக்கம் உட்பட ஏராளமான பரிசுகள், விருதுகளை வென்றுள்ளார்.
வறுமை நிலையில் இருந்து கடும் உழைப்பாலும், மேதைமையாலும் மிக உயர்ந்த நிலைக்கு வந்த ஸ்டீவ் ஜாப்ஸ் 2011-ம் ஆண்டு 56 வயதில் மறைந்தார்.
கருத்துகள் இல்லை:
கருத்துரையிடுக