இன்ஜினீயரிங் படிப்பவர்களின் வாழ்க்கைக் கனவே முன்னணி ஐ.டி நிறுவனம் ஒன்றில் பணியாற்றுவதுதான்.
அந்த நிறுவனங்களில் எவ்வளவு நபர்கள் பணியாற்றுகிறார்கள், அவர்களின் சந்தை எங்கு உள்ளது என்பது உள்ளிட்ட பல தகவல்கள் உங்களுக்காக.... (இந்தியாவில் பட்டியலிடப்பட்ட நிறுவனங்களில் முதல் 3 நிறுவனங்கள்)
ஐ.டி. ஊழியர்களுக்கு மிகக் குறைந்த ஊதியம் வழங்குவதில் உலக அளவில் இந்திய நிறுவனங்கள் முன்னிலையில் உள்ளன. ஐ.டி. துறையின் ஊதிய அளவீடுகளில் இந்திய நிறுவனங்கள் மோசமான போக்கைக் கொண்டிருப்பது ஆய்வு ஒன்றின் மூலம் தெரியவந்துள்ளது.
மிகக் குறைந்த ஊதியம் வழங்கி, உலகின் மிகவும் மோசமான நிலையில் உள்ள நாடுகளில் முதல் 10 இடங்களுக்குள் இந்தியா இடம்பெற்றுள்ளது. இடைப்பட்ட நிலையில் பணிபுரியும் இந்திய ஐ.டி. மேலாளரின் சராசரி ஆண்டு ஊதியம் 41,213 டாலர்கள் (சுமார் ரூ.27 லட்சம்) எனில், சுவிட்சர்லாந்து மேலாளர் அதைப் போல நான்கு மடங்குக்கும் அதிகமான ஊதியத்தைப் பெறுகிறார்.
'மைஹைரிங்கிளப்.காம்' எனும் வேலைவாய்ப்பு வலைதள நிறுவனம் 2015-ம் ஆண்டில் ஐ.டி. ஊழியர்களுக்கான உலக அளவிலான ஊதிய ஆய்வை மேற்கொண்டது.
அதில், இந்தியா மிகவும் குறைவான சம்பளத்தைப் பெறுபவர்கள் பிரிவில் ஏழாவது இடத்தைப் பிடித்திருக்கிறது. இந்திய ஐ.டி. மேலாளர்களின் சராசரி ஊதியம் 41,213 டாலர்களாக (சுமார் ரூ.27 லட்சம்) இருக்க, பல்கேரியா வெறும் 25,680 டாலர்கள் (சுமார் ரூ.17 லட்சம்) சம்பளத்துடன் முதல் இடத்தில் உள்ளது. 30,938 மற்றும் 34,423 டாலர்கள் ஊதியத்தோடு முறையே வியட்னாம் மற்றும் தாய்லாந்து அதற்கடுத்த இடங்களைப் பிடித்திருக்கின்றன.
அதைத்தொடர்ந்து இந்தோனேசிய நாட்டின் சராசரி சம்பளம் 34,780 டாலர்களாகவும், பிலிப்பைன்ஸ் (37,534 டாலர்கள்), இந்தியா (41,213 டாலர்கள்), சீனா (42,689 டாலர்கள்), செக் குடியரசு (43,219 டாலர்கள்) மற்றும் அர்ஜென்டீனா (51,380 டாலர்கள்) அடுத்தடுத்த இடங்களிலும் இருக்கின்றன.
மேலும் இது குறித்து ஆய்வு நிறுவனத்தின் தலைமை நிர்வாக அதிகாரி ராஜேஷ் குமார் கூறும்போது, "மேற்கு ஐரோப்பா மற்றும் வட அமெரிக்காவில் ஐ.டி. துறையின் அவுட்சோர்சிங், உலகளாவிய ஊதியத்தை நிர்ணயிக்கிறது.
கீழ்நிலை பொறுப்புகள், திறமைகள் மலிவாகக் கிடைக்கும் குறிப்பிட்ட சில பகுதிகளை ஆக்கிரமித்து விட்டன. மேற்கு ஐரோப்பா மற்றும் வட அமெரிக்காவில் குறைவான அளவிலேயே மீதம் இருக்கும் வேலைகளுக்கு, அதிக தேவைகள் உருவாகிவிட்டன. இருந்தாலும் இந்தியா வளர்ச்சிப் பாதையில் மெல்ல மெல்ல நகர்ந்துகொண்டிருக்கிறது. ஆனால் எதிர்கால வளர்ச்சிக்கு, பணம் மட்டுமே பிரதானமாக இருக்கும் நிலை மாற வேண்டும்" என்கிறார்.
அதேநேரத்தில், சிறந்த ஊதியம் பெறும் ஐ.டி. ஊழியர்களின் வரிசையில் சுவிட்சர்லாந்து முதல் இடத்தைப் பிடித்திருக்கிறது. சுவிஸ் ஐடி ஊழியர்களின் சராசரி ஆண்டு வருமானம் 1,71,465 டாலர்கள் (சுமார் ரூ.1 கோடியே 12 லட்சம்). அதற்கடுத்த இடத்தில் இருக்கும் பெல்ஜிய ஊழியர்களின் வருமானம் 1,52,430 டாலர்கள் (சுமார் ரூ.1 கோடி).
டென்மார்க் 1,38,920 டாலர்கள் ஆண்டு வருமானத்தோடு, சிறந்த ஊதியம் பெறும் ஐடி ஊழியர்களின் வரிசையில் மூன்றாம் இடத்தைப் பிடித்திருக்கிறது. 1,32,877 டாலர்கள் மற்றும் 1,29,324 டாலர்களோடு, அமெரிக்கா மற்றும் இங்கிலாந்து ஆகிய நாடுகள் அடுத்தடுத்த இடங்களில் இருக்கின்றன.
குறைவான செலவு என்னும் காரணி காரணமாக, இந்தியா சிறந்த அவுட்சோர்சிங் நாடாக விளங்கினாலும், எதிர்காலத்தில் இந்நிலை மாறும்" என்கிறது அந்த ஆய்வு.
2015, ஆகஸ்ட் 1 முதல் ஆகஸ்ட் 31 வரையிலான கால இடைவெளியில், 40 வெவ்வேறு நாடுகளைச் சேர்ந்த 9,413 நிறுவனங்களில் பணிபுரியும் இடைநிலை ஐ.டி. ஊழியர்களின் ஆண்டு ஊதியம் மற்றும் ஊக்கத் தொகையின் அடிப்படையில் இந்த ஆய்வு மேற்கொள்ளப்பட்டது என்பது குறிப்பிடத்தக்கது.
கருத்துகள் இல்லை:
கருத்துரையிடுக